अध्यक्षीय मनोगत

अध्यक्षीय मनोगत
आदरणीय सभासद बंधू-भगिनींनो,
सस्नेह नमस्कार!
गेल्या ४ ऑक्टोबर २०२६ रोजी पार पडलेल्या मंडळाच्या त्रैवार्षिक निवडणुकीत आपण सर्वांनी दाखविलेला अतूट विश्वास आणि भरभरून दिलेला पाठिंबा याबद्दल मी आपल्या सर्वांपुढे नतमस्तक आहे. या निवडणुकीत आपल्या ‘अजिंक्य पॅनेल’चे सर्व शिलेदार आणि मला तब्बल २/३ बहुमताने विजयी करून आपण मंडळाच्या इतिहासात एका नवीन पर्वाची सुरुवात केली आहे. आपण आमच्यावर सोपवलेली ही जबाबदारी केवळ एक पद नसून, आपल्या सर्वांच्या स्वप्नांची आणि विश्वासाची एक पवित्र धुरा आहे याची मला व माझ्या नवनिर्वाचित कार्यकारिणीला पूर्ण जाणीव आहे.
आपले मंडळ आता गौरवशाली ४८ व्या वर्षात पदार्पण करत आहे. अवघ्या दोन वर्षांत आपण सर्वजण मंडळाचा ऐतिहासिक सुवर्णमहोत्सव (५० वर्षे) साजरा करणार आहोत. या चार दशकांहून अधिक काळाच्या अविरत वाटचालीचा आणि सभासदांच्या प्रेमाचा मी स्वतः एक साक्षीदार राहिलो आहे.
एखादी संस्था जेव्हा मोठी होते, नावारूपास येते, तेव्हा काळानुरूप तिच्यात वैचारिक मंथन आणि अभिसरण सुरू होते. विचार आणि दृष्टिकोनातील विविधता ही संस्थेला अधिक गतिमान बनवत असते. ज्यांच्या दूरदृष्टीतून व संकल्पनेतून या मंडळाची स्थापना झाली, ते आदरणीय कृ. बा. शिर्के हे आजही आम्हां सर्वांना शुभाशीर्वाद व सामाजिक ऊर्जा देण्यासाठी आपल्या पाठीशी खंबीरपणे उभे आहेत. मंडळाचे पहिले अध्यक्ष ऋषितुल्य कै. वसंतराव सकपाळ यांच्यासह कै. धनाजीराव कदम, कै. चंद्रकांत देसाई, कै. गोपाळराव भोसले, कै. भाई सावंत, कै. राजाराम महाडिक, कै. जयरामराव भोसले, कै. सुधाकर महाडिक आणि कै. आत्माराम शिर्के या सर्व दिवंगत बुजुर्ग समाजधुरिणांचा समृद्ध वैचारिक वारसा आणि आदर्श आम्हाला लाभला, हे मी माझे परमभाग्य समजतो.
सभासदांना अपेक्षित असलेले, मंडळाच्या हिताचे आणि सर्वांगीण प्रगतीचे धोरण राबवणे हेच आमच्या कार्यकारिणीचे प्रमुख उद्दिष्ट आहे. जुन्या जाणत्यांचे अनुभव आणि नव्या पिढीचा उत्साह व आधुनिक दृष्टिकोन यांचा सुरेख मेळ घालत आम्ही हे मंडळ अधिक सर्वसमावेशक, पारदर्शक आणि गतिमान करणार आहोत. येणारा सुवर्णमहोत्सव दिमाखात साजरा करत असतानाच, नव्या पिढीला समाजकार्यात अग्रस्थानी आणण्यासाठी आम्ही कटिबद्ध आहोत.
आपण दिलेला कौल हा केवळ विजय नसून एका नव्या संकल्पाची नांदी आहे. या पुढील वाटचालीतही आपले प्रेम, सहकार्य आणि मार्गदर्शन असेच कायम पाठीशी राहील हा ठाम विश्वास आहे.
पुन्हा एकदा मनःपूर्वक धन्यवाद!
आपला नम्र,
श्री. शिवाजी सावंत
अध्यक्ष, मराठा मंडळ
(व समस्त नवनिर्वाचित कार्यकारिणी, अजिंक्य पॅनेल)